ҚАРАҒАНДЫ: «PARAPA PIZZA» ДӘМХАНАСЫ СЕРТИФИКАТТАЛДЫ

Қарағанды қаласындағы «Parapa Pizza» фаст-фуд дәмханасы сертификатталды. Жергілікті маман Амангелді Асқаров дәмхана аумағында аудит жұмыстарын жүргізіп, дайын өнімдердің халал талаптарына толықтай сай екендігін растады.

Тексеру барысында дәмхананың тағам дайындау барысындағы барлық кезеңдер – шикізатты қабылдау, сақтау, өңдеу және тұтынушыға ұсыну процестері егжей-тегжейлі сарапталды. Барлық өнімдер мен қосалқы ингредиенттердің шығу тегі расталып, халал талаптарына толық сәйкес екені анықталды.

Сондай-ақ, кәсіпорын қызметкерлеріне халал стандарттарының маңыздылығы, өндіріс барысында тыйым салынған заттарды қолданбау, және тазалық пен адалдық қағидаттарын сақтау бойынша арнайы семинар өткізілді. Нәтижесінде «Parapa Pizza» фаст-фуд дәмханасы тұтынушыларға адал әрі сапалы өнім ұсынатын кәсіпорын ретінде «QMDB Halal» сертификатына ие болды.