Алматы обл.: "AISER" құсфабрикасы тексерілді

**Алматы облысына арнайы іссапармен барған «Халал Даму» директоры Айбек Асқарбекұлы мен жергілікті жауапты өкіл Жұмабеков Жанәбіл өңірдегі ірі кәсіпорындардың бірі – «AISER» құсфабрикасында бақылау-қадағалау шараларын жүргізді.** «Aiser» сауда белгісімен құс еті өнімдерін өндіруші «Otan green food» кәсіпорны Алматы облысы, Тиірмен ауылында орналасқан. Құрылғанына аз уақыт болса да, жас кәсіпорын еліміздің оңтүстігімен қатар өзге де өңірлерді халал құс етімен қамтамассыз етіп отыр. «Халал Дамудың» бақылаушы комиссиясы жүргізген тексеріс нәтижесі бойынша «Aiser» құсфабрикасында «ҚМДБ халал» стандартын бұзу жағдайлары тіркелмеді. Құс бауыздау, өңдеу, өндіру, дайындау, сақтау, тасымалдау және сатудың барлық кезеңдері бекітілген талаптарға сай орындалуда. Мамандар тарапынан ескерту жасалынбады. Тексеріс шараларынан кейін, «Otan green food» кәсіпорны қызметкерлеріне халал өнім өндіру технологиясы, тағамдық қоспалар, өндіріс барысына қойылатын стандарт талаптары бойынша оқу-семинар өткізілді. «Астың адалдығы – бастың амандығы. Ішкен-жегеніміз адал болса, ұрпағымыз аман, деніміз сау болары анық. Ал халықтың адал ас тұтынуына бірден-бір себепкер сіздер. Сіздердің еңбектеріңіз сауапты һәм жауапты іс», - деген Айбек Асқарбекұлы құсфабрика қызметкерлері мен басшылығына алғысын білдірді.