БАС МҮФТИГЕ ХАЛАЛ ДАМУ ЕСЕБІ БЕРІЛДІ (Фоторепортаж)

Елордада Қазақстан мұсылмандары діни басқармасының төрағасы, Бас мүфти Наурызбай қажы Тағанұлының төрағалығымен кезекті жиын өтіп, «Халал Даму» стандарттау және сертификаттау ұйымының есебі тыңдалды Жиынға ҚМДБ төрағасының орынбасары, наиб мүфти Ершат Ағыбайұлы, Аппарат басшысы Ғылымбек Жәдігерұлы және де бөлім басшылары қатысты. Халал Даму» стандарттау және сертификаттау ұйымының директоры Айбек Аташев қоғамда халал ұғымының ауқымы кеңейгенін, мұсылмандар тарапынан сертификаты бар өнімдерге сұраныс артқанын тілге тиек етті. Оның айтуынша, бұған дейін «Халал Даму» ЖШС «Мал бауыздау және ет өңдеу», «Азық-түлік және қызмет көрсету» және «Халал» өнімді өндіру, даярлау, өңдеу, сақтау, тасымалдау және сату қызметтеріне қойылатын жалпы талаптар стандартымен жұмыс істесе, ендігі кезекте «Емдеу профилактикалық және дәрілік заттар», «Косметикалық өнімдер» стандартының жобасы дайындалуда. «Былтыр ҚР Әділет министрлігінің Ұлттық зияткерлік меншік институтынан «ҚМДБ ХАЛАЛ» тауар таңбасына № 71209 куәлігі берілді. Сондай-ақ 2020 жылы «QMDB halal» оқыту және білімді жетілдіру орталығы ашылды, Тараз қаласында халал жәрмеңке өтсе, Ақтөбеде тұңғыш халал маркет іске қосылды. HALALDAMU.KZ сайты жаңартылып, HALAL GUIDE Мобильді қосымшасы әзірленді» деп Айбек Асқарбекұлы былтырғы бірқатар жетістіктерді атап өтті. Жиын барысында Бас мүфти Наурызбай қажы нақты тапсырмалар берсе, аппарат қызметкерлері Халал Дамудың жұмысына қатысты ұсыныс-пікірлерін жеткізді.