БАТЫСТАҒЫ ҚАСАПХАНАЛАР ТЕКСЕРІЛДІ

«Халал Даму» директоры Айбек Асқарбекұлы мен халалдың Батыс Қазақстан облысы бойынша жауапты өкілі Асхат Асылбеков өңірдегі «Батыс адал ет» қасапханасы мен «Аманғалиев» мал сою пунктінде аудит жұмыстарын жүргізді.

«Тексеріс барысында мал бауыздау және союға қатысты қойылатын халал стандарты талаптарының орындалуы мен сақталуы назарға алынды. Малды қолмен, әрі, «Бисмиллаһ» айтып бауыздауы, мал сою барысында өткір, қалыңдығы мен ұзындығы стандартқа сай пышақты қолдануы, бір малдың көзінше өзге малды соймауы, қинамауы, малды бауыздағаннан кейін қан ағызу ұзақтығының бекітілген уақытқа сәйкес келуі, мал етін өңдеу, сақтау, сату, тасымалдау секілді процесстердің барлығында халал стандарт талаптарының жүйелі жүзеге асуы ескерілді. Қорытынды актіге сәйкес, тексеріс барысында қасапханаларда халал стандарты талаптарын бұзу жағдайлары анықталмады», – деп хабарлайды жауапты маманымыз.