Қызылорда: Әйел жамағатына арналған семинар өтті

ҚМДБ-ның Қызылорда облысы бойынша өкілдігінің ұйымдастыруымен жергілікті әйел жамағатқа арналған халал турасында оқу-семинар өткізілді. Семинарға «Халал Даму» технологы Жаннат Ахметқызы мен жергілікті өкіл Перизат Шарапатова қатысты.

Семинардың негізгі мақсаты – от анасы, әйел қауымның дініміздегі халал мәселесі жөнінде ақпарат беріп, білімін жетілдіруге негізделген.

«Ас – адамның арқауы» дейді дана халқымыз. Өйткені, ол – бойға қуат сыйлайтын тәннің азығы, Алланың нығметі деп білуіміз керек. Бірақ, көп жағдайда отбасына ас даярлау барысында әйел қауымы азық-түліктің халал-харамдығына мән бермей жатады. Пайғамбарымыз (с.а.у): «Арамнан желініп-ішілген нәрсе қырық күн бойы бойда сақталады»,- дейді. Тағы бір хадисінде: «Адал жеу – сауап, арам жеу – күнә»,- деген. Олай болса, ішер және ұсынар асымыз қалай әрі неден жасалғанына, құрамына, халал сертификаты бар-жоқтығына мән бергеніміз жөн. Себебі, халал ас жеу  – Алланың әміріне бойұсыну», – деген Жаннат Ахметқызы халал өнім өндіру технологиясы, тағамдық қоспалардың құрамы мен бөлінісі жөнінде мағлұмат берді.

Айта кетейік, қазіргі таңда технологтардың қатысуымен Қызылорда өңіріндегі кәсіпорындарда аудит жүргізілуде.