ТІС ПАСТАСЫНЫҢ ҚҰРАМЫНДА КЕЗДЕСЕТІН КҮМӘНДІ ҚОСПАЛАР

Тіс пастасы – адамның күнделікті қолданатын гигиеналық құралдарының бірі. Ол ауыз қуысының гигиенасын сақтауға, тісжегі мен ауыз қуысының ауруларын алдын алуға арналған. Бүгінгі таңда тіс пастасының көптеген түрлері бар: ағартқыш, емдік, балаларға арналған, сезімтал тістерге арналған және тағы басқа.

Тіс пастасының құрамы оның түріне байланысты өзгеріп отырады, бірақ негізгі компоненттер мыналар:

• Абразивтер:
  Тістің бетіндегі тағам қалдықтары мен бактериялардан пайда болған дақты кетіру үшін қолданылады. Мысалы, кальций карбонаты немесе кремний диоксиді. Абразивтер, әдетте, табиғи минералдардан жасалады және халал болып саналады. Алайда құрамында доңыз майынан алынған немесе жануарлардан алынатын компоненттер болса, олар харам болуы мүмкін. Сондықтан сертификатталған халал тіс пасталарын қолданған жөн.

• Фторидтер:
  Тісжегінің алдын алу үшін қолданылады. Олар тіс эмалін нығайтып, бактерияларды тежейді. Фтордың ең кең таралған түрлері – натрий фториді немесе монофторфосфат. Бұл компоненттер химиялық жолмен синтезделетіндіктен, халал деп есептеледі. Бірақ фторидтің концентрациясы қауіпсіз деңгейде болуы тиіс, себебі оның артық мөлшері зиянды.

• Антибактериалды заттар:
  Ауыз қуысының микрофлорасын теңестіріп, қабынудың алдын алады. Мысалы, триклозан немесе хлоргексидин. Бұл компоненттер көбінесе синтетикалық болып келеді. Дегенмен, кейбір антибактериалды заттар жануарлардан алынған ингредиенттер негізінде жасалуы мүмкін, сондықтан олардың халалдығына назар аударған дұрыс.

• Дәм мен хош иістендіргіштер:
  Жағымды дәм беру үшін ментол, эвкалипт майы сияқты компоненттер қолданылады. Егер хош иістендіргіштер табиғи өсімдіктерден немесе синтетикалық жолмен алынған болса, рұқсат етіледі. Бірақ алкоголь немесе харам өнімдерден алынған хош иістендіргіштер тіс пастасының харам болуына себеп болуы мүмкін.

• Ылғал сақтағыштар:
  Глицерин немесе сорбитол тіс пастасының кеуіп қалмауын қамтамасыз етеді. Бұл компоненттер синтетикалық немесе өсімдік көздерінен алынған жағдайда халал. Алайда жануарлардан алынған глицерин қолданылса, оның қайдан алынғанын анықтау маңызды. Егер ол шариғатқа сәйкес сойылмаған жануардан немесе доңыздан алынған болса харам.

• Көбіктендіргіштер:
  Содиум лаурилсульфаты тіс пастасының жақсы таратылуына ықпал етеді. Бұл компонент көбінесе синтетикалық жолмен жасалады және халал деп саналады.

Тіс пастасын таңдаған кезде оның құрамындағы компоненттердің халал екеніне көз жеткізу үшін өнімнің сертификатын тексерген жөн. Әсіресе глицерин, дәм және хош иістендіргіштер, сондай-ақ басқа да жануарлардан алынған қосындыларға ерекше назар аудару қажет.