ӨЗБЕКСТАНДА КЕЗЕКТІ АУДИТ

Өзбекстандағы кәсіпорындарда аудит жұмыстары жүргізілуде. Бақылау-қадағалау шараларын «Халал Дамудың» бас сарапшы технологы Гүлмира Маратқызы мен жергілікті өкіл Қазбек Сарыбаев орындады. Аудит барысында сертификаттаудан өтуге өтініш білдірген СП ООО «Naturarom Flavors Fragrances» және «Puffico» кәсіпорындары тексерілді.

Аудит барысында кәсіпорындардың өндірістік процестері мен өнімдерінің стандарттарға сәйкестігі тексерілді. «Naturarom Flavors Fragrances» және «Puffico» компанияларының халал сертификаттау талаптарына сәйкес келетінін анықтау мақсатында олардың өндірістік жағдайлары мен қолданатын шикізаттары тексерілді. Атап айтқанда, шикізаттың шығу тегі, өндіріс барысында қолданылатын әдістер, гигиеналық талаптарға сәйкестігі мен өнімнің соңғы сапасы сарапталды.

Гүлмира Маратқызы мен Қазбек Сарыбаев әрбір өндірістік кезеңде халал талаптарының сақталуын, өнімнің құрамында спирт немесе басқа да тыйым салынған заттардың болмауын мұқият бақылап отырды. Сонымен қатар, өндіріс орындарының тазалығы мен жұмысшылардың кәсіби біліктілігі де ерекше назарға алынды. Аудит нәтижелері бойынша кейбір техникалық түзетулер енгізу қажеттілігі ескертіліп, тиісті ұсыныстар берілді.