Павлодар: «Халал Даму» өкілі Успенка ауданында
Павлодар облысы, Успенка ауданы мешітінің бас имамы Керімхан Оразовтың ұйымдастыруымен ҚМДБ-ның «Халал Даму» ЖШС Павлодар облысы бойынша өкілі Какенов Қазбектің қатысуымен жергілікті мұсылман жамағатымен кездесу өтті.
Кездесуге мешіт алқа мүшелері, намазхан жамағаты, аталмыш ауданға қарасты ауыл имам-молдалары, қасапшылар, мал сою қасапханасының басшысы, "Рысты" кафесінің иесі және ауыл тұрғындарымен қоса жалпы елуге жуық адам қатысты.
Қазбек Әшкенұлы кездесуге қатысушыларға халал туралы толық түсінік бере келе,халал және харам – өмірдің барлық аспектілерінде қолданылатын универсалды жүйе екендігін айтты. Арықарай, бірақ біз бұл терминді тек тағам өнімдері, ет өнімдері, косметика, жеке бас гигиениалық өнімдері, фармацевтикалық өнімдер, тағамдық қоспалар және тағаммен жанасатын материалдарға қатысты қолданамыз дей келе, «Халал Даму» бөлімінің мақсатын жиналған көпшілікке кеңінен түсіндірді.
Сонымен қатар заман талабына сай электронды және бейнебаян мәліметтер арқылы «Халал Даму» технологиясының жұмыстарымен таныстырды, осы уақытқа дейін ҚМДБ тарапынан Халал сертификаты берілген еліміздегі кәсіпорындар жайлы да ауқымды ақпарат айтылып өтті.
Кездесу-семинары барысында имам-молдалар көкейде жүрген көптеген сауалдарын қойып, маманнан нақты жауаптарын алды.
