АЛМАТЫ ОБЛ.: МЕШІТ ИМАМДАРЫНА СЕМИНАР

Алматы облысы, Ұйғыр ауданының имамдарына «Халал – шариғат талабы» тақырыбында оқу-семинар өткізілді. Семинарда «Халал Дамудың» жергілікті өкілі Жанәбіл Ахметбекұлы дәріс оқыды.

Семинар барысында халал өнімдер өндірісі, сертификаттау процесі және шариғаттың осы саладағы талаптары туралы егжей-тегжейлі түсіндірді. Халал ұғымының тек азық-түлікпен шектелмей, барлық тұрмыс салаларына қатысты екендігін атап өтті. Жанәбіл Ахметбекұлы халал өнімнің тек физикалық емес, моральдық және рухани тазалыққа да негізделгенін, бұл ұстанымның мұсылман қауымының күнделікті өмірінде қаншалықты маңызды екенін баяндады.

Семинар барысында имамдар сұрақтар қойып, халал өнімдерінің ерекшеліктері мен шариғатқа сәйкес келетін өндіріс процестерін тереңірек түсінуге мүмкіндік алды. Сонымен қатар, семинарда халал сертификатын алу үшін қажетті талаптар мен рәсімдер туралы да сөз қозғалды. Жанәбіл Ахметбекұлының айтуынша, халал өнімдер тек мұсылмандар үшін ғана емес, барлық тұтынушылар үшін сапалы, қауіпсіз және адал таңдауды қамтамасыз етеді.