«Doner Kebab cafemaina» фаст-фуд өнімдері сертификатталды

Елорда тұрғындарына кеңінен танылған «Doner Kebab cafemaina» фаст-фуд өнімдері «QMDB halal» сертификатына ие болды. Аталған кәсіпорын «Тамақтандыру қызметтері», «Халал өнімдерді өндіруге, өңдеуге, дайындауға, сақтауға, тасымалдауға және сатуға қойылатын жалпы талаптар» стандартына сай деп танылды.

Қазақстан мұсылмандары діни басқармасына арнайы келген «Doner Kebab cafemaina» сауда белгісімен өнім өндіретін «Стандарт» кәсіпорны өкіліне «Халал Даму» директоры Айбек Асқарбекұлы ұжым жұмысы мен халал таңбасының маңыздылығын түсіндірді.

«Халал – адалдық пен тазалықтың таңбасы. «Халал Даму» ұйымы еліміздегі күллі мұсылмандардың адал ас тұтынуына жауапкершілік жүгін арқалаған ұйым. Халал өнімді тұтынушыларға адал ас ұсыну ниетімен «QMDB halal» стандарты бойынша сертификаттаудан өткендеріңізге Алла разы болсын! Алла кәсіптеріңізге береке берсін!» – деген Айбек Асқарбекұлы «Doner Kebab cafemaina» дәмханасында алдағы уақытта мамандар тарапынан міндетті тексеріс жұмыстары жүргізілетінін ескертті.

Өз кезегінде «Стандарт» кәсіпорны өкілі «Халал Даму» мамандарына алғысын білдіріп, ұжым жұмысына сәттілік тіледі.