«HALAL EXPO-2024»: КӨРМЕ ҚАТЫСУШЫЛАРЫНА АЛҒЫС ХАТ БЕРІЛДІ

Таразда ҚМДБ «Халал Даму» стандарттау және сертификаттау орталығының ұйымдастыруымен өтіп жатқан «HALAL EXPO-2024» халықаралық көрмесіне «QMDB Halal» сертификатын иеленген 70-ке жуық өнім түрі қойылды. Аталмыш өнімдерді халыққа ұсынған кәсіпорын басшыларын «Халал Даму» мекемесінің директоры Айбек Асқарбекұлы алғыс хатпен марапаттады.  

«Халал индустриясын дамыту, халал өнімдерді насихаттау, отандық кәсіпорындарды қолдау мақсатында  «HALAL EXPO-2024» халықаралық халал өнімдер көрмесіне қатысқаныңыз үшін өз алғысымды білдіремін! Сіз – «QMDB Halal» таңбасымен адал өнім өндіру арқылы халық игілігі мен ұлт болашағы үшін қызмет етудесіз. Шариғат талабы халалдың дамуы жолында аянбай еңбек етіп, биік белестерді бірге бағындыратынымызға сенемін!» делінген алғыс хатта.

Сондай-ақ дәл осындай алғыс хатпен «Халал Даму» мекемесінің өңірлердегі жауапты мамандары, технологтар марапатталды.

Айта кетейік, осымен төртінші рет ұйымдастырылған «HALAL EXPO-2024» халықаралық көрмесі Тараз қаласында кеше басталған болатын.