МАҢҒЫСТАУ ОБЛ.: "АҚТАУ-АГРО" ҚҰС ФАБРИКАСЫ СЕРТИФИКАТТАЛДЫ

Маңғыстау облысы, Түпқараған ауданында орналасқан "Ақтау-Агро" кәсіпорнына тиесілі "Каспий құс" құс фабрикасы "QMDB HALAL" сертификатына ие болды. Сертификатты "Халал Даму" директоры Айбек Асқарбекұлы табыстады. Сертификаттауға облыстық кәсіпкерлік және сауда басқармасының басшысы Тоқбаева Жанна Жұмабайқызы, Маңғыстау облысы ауылшаруашылық басқармасының басшысы Қалдығұл Серік Сырымұлы, Түпқараған ауданы әкімінің орынбасары Тілепов Өсер Тоқтағанұлы, Маңғыстау облысының бас имамы Әнуар Ізімбайұлы, "Халал Дамудың" жергілікті инспектор-контролер маманы Айтқожаев Мәжит, сонымен қатар, облыстық "Қазақстан-Маңғыстау", "Ақтау" телеарналары мен жергілікті бұқаралық ақпарат құралдары қатысты.

"Маңғыстау облысындағы бройлер тауықтарды өндіретін бірден-бір ірі құс фабрикасы - "Ақтау-Агро". Кәсіпорын үстіміздегі жылдың көктемінде іске қосылды. Қазіргі таңда жергілікті сауда орындарында «Каспий құс» сауда белгісімен шығарылатын өнімдердің алғашқы партиясы сатылымға енгізілді. Жоспар бойынша құс фабрикасы облыс халқының тауық еті өнімдеріне қажеттіліктің жартысын қамтамасыз етеді деп күтілуде. Маңғыстау облысы жылына орта есеппен 11,5 мың тонна тауық етін тұтынады, ал осы уақытқа дейін бұл өнім импортқа тәуелді болып келген. Жаңа құс фабрикасының қуаттылығы - жылына 5 мың тоннаға жуық тауық еті деп жоспарлануда. "Ақтау-Агро" кешені 3 үлкен алаңнан тұрады. Олар: инкубатор, 30 мың басқа арналған 16 құс қорасы,  ғылыми зертхана мен ветеринарлық пост бар. Құс фабрикасында сағатына  8000 мың бас тауық сойылады. "Ақтау-Агро" құс фабрикасының өндірісі мен дайын өнімдері "Халал Дамудың" білікті мамандары тарапынан толықтай тексеріліп, нәтижесінде, аталған кәсіпорын "Мал бауыздау және ет өңдеу", "Халал өнімдерді өндіруге, өңдеуге, дайындауға, сақтауға тасымалдауға және сатуға қойылған жалпы талаптар стандартына" сай деп танылды. "Ақтау-Агро" – еліміздің батыс өңіріндегі отандық өнімдерді өндіретін ең ірі кәсіпорындардың бірі. Сондықтан, отандық өнімдерді қолдауымыз керек", – деді Айбек Асқарбекұлы.

Жергілікті халықтың сұранысы нәтижесінде қуанышына айналған "Ақтау-Агро" құс фабрикасына берілген "QMDB HALAL" сертификаты 12.07.2021-11.07.2022 мерзімі аралығында жарамды. "Каспий құс" өнімдерінің толықтай тексерілгендігін, "QMDB HALAL" стандарты талаптарына сай екендігін хабарлаймыз!