МЕШІТ ИМАМДАРЫНА СЕМИНАР ҰЙЫМДАСТЫРЫЛДЫ

Алматы облысы, Еңбекшіқазақ ауданы имамдарына «Халал – шариғат талабы» тақырыбында оқу-семинар өткізілді. Семинарда «Халал Дамудың» жергілікті өкілі Жанәбіл Жұмабеков дәріс оқыды.

Шара барысында шариғаттағы халал және харам ұғымдары, сондай-ақ халал өнімдерді сертификаттау талаптары, халал стандарттарының маңыздылығы, кеңінен түсіндірілді. Имамдарға халал индустриясының даму үрдістері, азық-түлік, тұрмыстық тауарлар мен қызмет көрсетудегі халал қағидалары жайлы жан-жақты ақпарат берілді.

Семинарға қатысушылар халал өнімдеріне қойылатын талаптар, өндіріс орындарында жүргізілетін аудит жұмыстары, халал сертификатының маңыздылығы мен халыққа дұрыс ақпарат беру жолдары бойынша сұрақтар қойып, өзара пікір алмасты. Сонымен қатар, имамдарға халал стандарттарының мешіт жамағатына дұрыс жеткізілуі мен қоғамда халал мәселесіне қатысты түсініспеушіліктердің алдын алу бойынша ұсыныстар айтылды. Іс-шара соңында қатысушылар сұрақтарына жауап беріліп, болашақта осындай семинарларды тұрақты түрде өткізу қажеттілігі талқыланды.