АҚТӨБЕ: «ОТБАСЫ. РАМАЗАН. АДАЛ АС» СЕМИНАРЫ ӨТТІ

Рамазан айында ораза ұстаушыларға ақпараттық қолдау көрсету мақсатында Ақтөбе қаласындағы «Бақытжан» мешітінде әйел жамағатына арналған «Отбасы. Рамазан. Адал ас» тақырыбында семинар өтті. Шараны мешіт ұстазы Анар Түгелбайқызы мен «Халал Дамудың» Ақтөбе облысы бойынша жауапты технологы Ақмаржан Ержанқызы ұйымдастырды.

Семинар барысында мешіт ұстазы Рамазан айының қасиеті, отбасы құндылықтары және осы айда жасалатын құлшылықтардың маңыздылығы жөнінде дәріс оқыды. Ол оразаның рухани және физикалық пайдасына тоқталып, бұл айдың сабыр мен кешірімділік, жақсылық жасау секілді ізгі қасиеттерді қалыптастырудағы рөлін ерекше атап өтті.

Өз кезегінде, «Халал Дамудың» Ақтөбе облысы бойынша жауапты технологы Ақмаржан Ержанқызы адал астың маңызы туралы айтып, халал өнімдерді дұрыс таңдау жолдарын түсіндірді. Ол халал стандарттарының негізгі талаптарын, сертификатталған өнімдерді тану тәсілдерін және күмәнді азық-түліктерден сақтанудың маңыздылығын баяндады. Сонымен қатар, Рамазан айында ораза ұстаушылар үшін дұрыс тамақтану, ауызашар мен сәресіге арналған пайдалы тағам түрлері жайлы кеңестер берді.

Семинар соңында қатысушылар өздерін қызықтырған сұрақтарын қойып, ораза кезіндегі тамақтану әдебі, отбасыдағы тәрбие және халал өнімдерді тұтыну мәселелері бойынша пайдалы мәліметтер алды. Әйел жамағаты мұндай танымдық шаралардың маңыздылығын атап өтіп, ұйымдастырушыларға алғыстарын білдірді.