ЖЕТІСУ: «БАЛШЕКЕР» ДӘМХАНАСЫ СЕРТИФИКАТТАЛДЫ

Жетісу облысындағы «Балшекер» қоғамдық тамақтану орны «QMDB Halal» стандарты талаптарына сай сертификатталды. Облыстың бас имамы Керімбек Сәрсембайұлы мен «Халал Дамудың» жергілікті өкілі Мұхаммед Ордыбай жұма намазында кәсіпорын басшысына халал сертификатын табыстап, кәсіптеріне береке тіледі.

Сертификаттау барысында асхананың өндіріс процесі, шикізат базасы, санитарлық-гигиеналық жағдайы және қызметкерлердің халал стандарттары бойынша біліктілігі жан-жақты тексерілді. Барлық талаптарға сәйкестігі расталғаннан кейін «Балшекер» асханасына ресми түрде «QMDB Halal» сертификаты берілді. Шара барысында жергілікті имамдар мен «Халал Даму» өкілдері халал өндірісінің маңыздылығын атап өтіп, тұтынушыларға адал әрі сапалы өнім ұсынудың жауапкершілігі туралы түсіндірме жұмыстарын жүргізді. Кәсіпорын басшылығы өз кезегінде халал талаптарын қатаң сақтауға дайын екенін айтып, сенім білдіргені үшін алғыс білдірді.

Сонымер қатар, жұма намазынан кейін «Балшекер» кәсіпорны жергілікті жамағатқа тегін ас үлестіріп, игі дәстүр жалғасын тапты. Бұл қайырымдылық шарасы кәсіпорынның халал қағидаттарына адалдығын көрсетіп қана қоймай, қоғамға қызмет етудің маңыздылығын дәріптеді.